لیسکو ملازمین کی مبینہ کرپشن: وزیرِ دفاع خواجہ آصف کا اپنی ہی حکومت کے محکمے پر بڑا انکشاف

 لاہور . اسلام آباد ویب ڈیسک

وفاقی وزیرِ دفاع اور سابق وزیرِ توانائی خواجہ محمد آصف نے لیسکو LESCO ملازمین کی مبینہ کرپشن اور رشوت ستانی کا پردہ چاک کرتے ہوئے ایک حیران کن انکشاف کیا ہے۔ انہوں نے بتایا کہ ان کی ذاتی سفارش کے باوجود لیسکو ملازمین نے ٹرانسفارمر کی مرمت کے لیے غریب دیہاتیوں سے 80 ہزار روپے بٹور لیے اور کوئی رسید بھی جاری نہیں کی گئی

سماجی رابطے کی ویب سائٹ پر اپنے ایک بیان میں وفاقی وزیر خواجہ آصف نے ملک کے بجلی کے نظام اور عام صارف کی بے بسی کا رونا روتے ہوئے لکھا

میرے گھریلو ملازم کے گاؤں میں ٹرانسفارمر جل گیا تھا  میں نے لیسکو کے ایک پرانے مہربان سی ای او CEO کو فون کیا کہ کسی کو کہیں اور مہربانی فرمائیں۔ ملازمین نے ٹرانسفارمر مرمت تو کر دیا، لیکن اس کے بدلے 80,000 روپے لے لیے

غریب دیہاتیوں سے چندہ اور بغیر رسید ادائیگی

خواجہ آصف نے مزید تفصیلات بتاتے ہوئے کہا کہ گاؤں کے غریب لوگوں نے چندہ جمع کر کے لیسکو ملازمین کو یہ خطیر رقم ادا کی۔ رقم کی باقاعدہ ادائیگی کے باوجود لیسکو حکام اور ملازمین نے اس کی کوئی رسید دینے سے صاف انکار کر دیا عام صارف کا کیا حال ہوگا. خواجہ آصف کا بڑا سوال

وفاقی وزیر نے محکمے کی اس دیدہ دلیری پر شدید افسوس اور حیرت کا اظہار کرتے ہوئے کہا کہ باقی آپ خود اندازہ لگا سکتے ہیں یہ حال ہے کہ ایک سابق بجلی کا وزیر سفارشی ہو اور موجودہ کابینہ کا رکن بھی ہو، اس کی سفارش پر بھی واردات سے گریز نہیں کیا جاتا۔ تو پھر عام صارف کا کیا حال ہوگا

وزیرِ دفاع کے اس بیان کے بعد سوشل میڈیا پر ایک نئی بحث چھڑ گئی ہے جہاں صارفین کا کہنا ہے کہ جب ملک کے طاقتور ترین وزراء کے سامنے لیسکو کا یہ حال ہے تو عام عوام روزانہ کس عذاب سے گزرتی ہوگی۔ اب دیکھنا یہ ہے کہ وزارتِ توانائی اور لیسکو چیف اس کھلے انکشاف پر کیا ایکشن لیتے ہیں