اسلام آباد: عید کی رات گلبرگ گرینز میں زمین کے تنازع پر ڈیڑھ گھنٹہ فائرنگ، پولیس تماشائی بنی رہی، ایک شہری زخمی

 

اسلام آباد. وفاقی دارالحکومت کی سب سے اہم اور مصروف ترین ہاؤسنگ سوسائٹی "گلبرگ گرینز عید کی رات میدانِ جنگ بن گئی زمین کے دیرینہ تنازع پر دو مسلح گروپوں کے درمیان لگاتار ڈیڑھ گھنٹے تک شدید فائرنگ کا سلسلہ جاری رہا، جس کے نتیجے میں ایک معصوم راہگیر شدید زخمی ہو گیا جبکہ متعدد رہائشی مکانات پر بھی گولیاں لگیں۔ انتہائی افسوسناک امر یہ ہے کہ سیکیورٹی کے بڑے بڑے دعوے کرنے والی سوسائٹی کے گارڈز غائب رہے اور پولیس بھی ایک کلومیٹر دور کھڑی فائرنگ رکنے کا انتظار کرتی رہی

اندھادھند فائرنگ اور رہائشیوں میں خوف و ہراس

ذرائع کے مطابق عید کی رات جہاں لوگ خوشیاں منا رہے تھے، وہیں گلبرگ گرینز سوسائٹی گولیوں کی تھرتھراہٹ سے گونج اٹھی۔ دو بااثر گروپوں کے کارندوں نے ایک دوسرے پر جدید ہتھیاروں سے اندھادھند فائرنگ کی۔ فائرنگ کا یہ سلسلہ معمولی نہیں تھا بلکہ ڈیڑھ گھنٹے تک بلا خوف و خطر جاری رہا

اس ہولناک فائرنگ کی زد میں آ کر وہاں سے گزرنے والا ایک معصوم رہائشی شدید زخمی ہو گیا، جسے فوری طور پر ہسپتال منتقل کیا گیا۔ اس کے علاوہ گولیوں کی بوچھاڑ سے سوسائٹی کے متعدد گھروں کی دیواریں اور کھڑکیاں چھلنی ہو گئیں، جس سے سوسائٹی کے مقیم خاندانوں اور بچوں میں شدید خوف و ہراس پھیل گیا اور لوگ گھروں میں محصور ہو کر رہ گئے

وفاقی پولیس اور سوسائٹی سیکیورٹی کی مجرمانہ غفلت

واقعے نے وفاقی دارالحکومت کے سیکیورٹی اداروں اور سوسائٹی انتظامیہ کی کارکردگی پر بہت بڑا سوالیہ نشان کھڑا کر دیا ہے عید کی رات سوسائٹی کے سینکڑوں نام نہاد سیکیورٹی گارڈز کہیں نظر نہیں آئے جبکہ اسلام آباد پولیس کے جوان اطلاع ملنے کے باوجود جائے وقوعہ سے محض ایک کلومیٹر دور کھڑے تماشائی بنے رہے اور فائرنگ ختم ہونے کا انتظار کرتے رہے

سوسائٹی انتظامیہ پر پشت پناہی کا الزام

ذرائع نے سنسنی خیز انکشاف کرتے ہوئے بتایا ہے کہ گلبرگ ہاؤسنگ سوسائٹی کی انتظامیہ ایسے زمین کے تنازعات میں اکثر کسی ایک پسندیدہ گروپ کی حمایتی اور پشت پناہ ہوتی ہے۔ یہی وجہ ہے کہ پولیس بھی سوسائٹی انتظامیہ کی مرضی اور اشارے کے بغیر کوئی ٹھوس قدم اٹھانے سے کتراتی ہے، جس کا خمیازہ وہاں کے پرامن رہائشیوں کو بھگتنا پڑ رہا ہے

رہائشیوں نے وزیرِ داخلہ اور آئی جی اسلام آباد سے مطالبہ کیا ہے کہ اس واقعے کا فوری نوٹس لیا جائے، ملوث گروپوں کے خلاف سخت قانونی کارروائی کی جائے اور ڈیوٹی سے غفلت برتنے والے پولیس اہلکاروں کا محاسبہ کیا جائے