اسلام آباد میں انسانی اعضا کی غیر قانونی خرید و فروخت کا بڑا نیٹ ورک بے نقاب، چینی باشندوں سمیت 5 ملزمان گرفتار

 

اسلام آباد وفاقی دارالحکومت میں فیڈرل انویسٹی گیشن ایجنسی    FIA اور ہیومن آرگن ٹرانسپلانٹ اتھارٹی  HOTA نے ایک مشترکہ اور بڑی کارروائی کرتے ہوئے انسانی اعضا کی غیر قانونی خرید و فروخت اور اسمگلنگ میں ملوث ایک بین الاقوامی گینگ کو بے نقاب کر دیا ہے۔ اسلام آباد کے پوش علاقے سیکٹر ایف سیون F-7 میں مارے گئے اس چھاپے کے دوران چینی باشندوں سمیت 5 اہم ملزمان کو گرفتار کر لیا گیا ہے، جو ملک کے بڑے شہروں سے انسانی اعضا حاصل کر کے انہیں بیرون ملک اسمگل کرنے کے دھندے میں ملوث تھے

حکام کے مطابق، اس چھاپے کے دوران جائے وقوعہ سے بھاری مقدار میں انسانی پلاسنٹا Placentaناڑ برآمد ہوا ہے۔ برآمد کیے گئے ذخیرے میں تازہ، خشک اور باقاعدہ پراسیس شدہ پلاسنٹا شامل ہے ایف آئی اے نے کارروائی کے دوران نہ صرف انسانی اعضا کو قبضے میں لیا بلکہ وہاں موجود پراسیسنگ کے لیے استعمال ہونے والا تمام مٹیریل اور جدید مواد بھی اپنے کنٹرول میں لے لیا ہے

ہسپتالوں سے سپلائی اور نیٹ ورک کا انکشاف

ابتدائی تحقیقات اور تفتیش کے دوران یہ چونکا دینے والے انکشافات سامنے آئے ہیں کہ یہ گینگ پاکستان کے مختلف شہروں کے ہسپتالوں سے یہ انسانی پلاسنٹا حاصل کرتا تھا ملزمان نے پشاور، راولپنڈی اور لاہور کے متعدد سرکاری و نجی ہسپتالوں میں اپنا ایک باقاعدہ نیٹ ورک قائم کر رکھا تھا، جہاں سے وہ ملی بھگت کے ذریعے یہ حساس انسانی اعضا جمع کر کے اسلام آباد منتقل کرتے تھے

اس گھناؤنے کاروبار کو چلانے کے لیے ملزمان نے مقامی سہولت کاروں کی خدمات حاصل کر رکھی تھیں۔ ان مقامی کارندوں کی مدد سے ہسپتالوں سے پلاسنٹا خفیہ طور پر غائب کیا جاتا اور پھر اسے اسلام آباد کے اس خفیہ مرکز میں لا کر پراسیس کیا جاتا تھا

بیرون ملک اسمگلنگ کا طریقہ کار Modus Operandi

ایف آئی اے حکام کے مطابق، یہ گینگ پراسیس شدہ انسانی پلاسنٹا کو بین الاقوامی مارکیٹ میں اسمگل کرنے کے لیے انتہائی چالاکی کا مظاہرہ کر رہا تھا کسٹمز اور دیگر سیکیورٹی اداروں کی آنکھوں میں دھول جھونکنے کے لیے ملزمان اس انسانی پلاسنٹا کو "بھیڑ کے اعضاSheep Organs ظاہر کرتے تھے اور دستاویزات میں غلط بیانی کر کے اسے قانونی کارگو کے طور پر بیرون ملک بھیجتے تھے۔

تحقیقات میں یہ بات بھی سامنے آئی ہے کہ اس پراسیس شدہ پلاسنٹا کی بڑی کھیپ ویتنام اسمگل کی جا رہی تھی واضح رہے کہ انسانی پلاسنٹا کو مختلف قسم کی مہنگی ادویات، کاسمیٹکس اور روایتی چینی ادویات کی تیاری میں استعمال کیا جاتا ہے، جس کی عالمی مارکیٹ میں بھاری قیمت وصول کی جاتی ہے

مزید تحقیقات اور قانونی کارروائی

ایف آئی اے نے کارروائی کے بعد برآمد ہونے والے تمام انسانی پلاسنٹا کے نمونے طبی معائنے اور تفصیلی فورنزک رپورٹ کے لیے پمز PIMS ہسپتال اسلام آباد بھجوا دیے ہیں طبی ماہرین کی رپورٹ آنے کے بعد کیس میں مزید سخت دفعات شامل کی جائیں گی

حکام کا کہنا ہے کہ گرفتار ملزمان سے تفتیش کا عمل تیزی سے جاری ہے اور اس بات کا قوی امکان ہے کہ آنے والے دنوں میں پشاور، لاہور اور راولپنڈی کے کئی نامور ہسپتالوں کے عملے اور ڈاکٹروں کی گرفتاریاں بھی عمل میں آئیں گی جو اس غیر قانونی اور غیر اخلاقی کاروبار میں ان کا ساتھ دے رہے تھے۔ انسانی اعضا کے اس بین الاقوامی نیٹ ورک کے مکمل خاتمے کے لیے ایف آئی اے کی ٹیمیں مسلسل چھاپے مار رہی ہیں