شکارپور: معروف گلوکارہ صنم سندھو پر شادی کی تقریب میں قاتلانہ حملہ اور بدترین تشدد، کئی گھنٹوں تک یرغمال بنائے رکھنے کا انکشاف

 

شکارپور. سندھ کے شہر شکارپور میں معروف گلوکارہ صنم سندھو نے الزام عائد کیا ہے کہ انہیں ایک شادی کی تقریب کے دوران مبینہ طور پر قاتلانہ حملے اور بدترین تشدد کا نشانہ بنایا گیا ہے

فنکارہ کے مطابق یہ افسوسناک واقعہ نیو فوجداری تھانے کی حدود میں واقع میرانی محلے میں پیش آیا، جہاں انہیں لاکھو برادری کی ایک شادی کی تقریب میں پرفارم کرنے کے لیے مدعو کیا گیا تھا صنم سندھو کا کہنا ہے کہ پروگرام کے دوران کچھ نشے میں دھت افراد مسلسل بیہودہ حرکات کرتے رہے

ٹیم پر تشدد اور یرغمال بنانے کا دعویٰ

گلوکارہ نے سنگین انکشافات کرتے ہوئے بتایا کہ ملزمان نے ان پر قاتلانہ حملہ کیا اور ان کے چھوٹے بھائی سمیت پوری میوزک ٹیم کو بدترین تشدد کا نشانہ بنایا۔ انہوں نے مزید دعویٰ کیا کہ انہیں کئی گھنٹوں تک وہاں یرغمال بنا کر رکھا گیا، ان کا قیمتی ساز و سامان چھین لیا گیا اور پروگرام کا طے شدہ معاوضہ بھی ادا نہیں کیا گیا

حکام سے نوٹس لینے کا مطالبہ اور پولیس کارروائی

واقعے کے خلاف گلوکارہ اور ان کی ٹیم نے شدید احتجاجی مظاہرہ کیا ہے۔ صنم سندھو نے صوبائی وزیرِ ثقافت آئی جی سندھ اور دیگر اعلیٰ حکام سے واقعے کا فوری نوٹس لینے اور انصاف فراہم کرنے کا مطالبہ کیا ہے

دوسری جانب پولیس بھی اس معاملے پر متحرک ہو گئی ہے ایس ایس پی شکارپور کلیم ملک کے مطابق واقعے کی رپورٹ متعلقہ تھانے میں درج کرلی گئی ہے اور واقعے میں ملوث تمام ملزمان کے خلاف سخت قانونی کارروائی عمل میں لائی جائے گی